Underskog

Omtale av boka:
Svalene i Lisboa plasserer Ronny Spaans både i ein nynorsk poesitradisjon og i ein større europeisk fellesskap, med Elena Sjvarts og Bella Achmadulina i Russland og Derek Mahon i Irland som tilknytingspunkt – alle representantar for ein ubroten klassisk orientert lyrikktradisjon i utkanten av Europa, som har fornya seg i samsvar med ein samtidig, modernistisk poetikk. Med vekt på bilete, rytme og forteljing står Spaans fram som eit friskt pust i norsk lyrikk.

Presentasjon av lyrikaren:
Ronny Spaans er fødd i 1976 og oppvaksen i Brønnøysund. Han har budd i Nederland, Portugal og Spania. Han er medarrangør av poesikveldane på Senter for frie kunster og skribent i avisa “Dag og Tid” og doktorgradsstipendiat ved Universitetet i Oslo. Han har publisert artiklar og dikt i “Aorta”, “Bokvennen”, “Lyrikvännen” og “Norsk Litterær Årbok” og har redigert ei nyutgåve av Emil Boysons Europeisk poesi (2006). I år er han medredaktør av ei essaysamling til hundreårsminnet åt Olav H. Hauge. Med Svalene i Lisboa debuterer Spaans som lyrikar.

“Svalene i Lisboa” er utgjeven på Wigestrand Forlag og kan tingast på nettsidene åt forlaget. Boka vil også vera til sals på Café Art’é . Fyrste del av boka inneheld ein diktsuite med tema frå Portugal, “Skisser frå Portugal”. Desse og andre dikt vil bli lesne opp under arrangementet, som vil ha eit portugisisk preg: Portugisisk vin vil vera til sals og portugisiske smårettar vil bli serverte.